3/07/2018

عـــزب يفتح بابه للمعلمين بلقاء شهرى لحل مشاكلهم وحوار حول اجازة السبت وخصومات المعلمين وتغيير المسمى الوظيفى والمسابقة الجديدة





عزب يفتح بابه للمعلمين بلقاء شهرى لحل مشاكلهم وحوار حول اجازة السبت وخصومات المعلمين وتغيير المسمى الوظيفى والمسابقة الجديدة


حوار اجراه / هناء خيرى - مصطفى الكومى   


 في حوار أجراه الاستاذ مصطفى الكومى والاستاذه هناء خيرى مع السيد محمد محمود عزب مدير مديرية التربية والتعليم بالمنيا حصرياً لموقع خبر عاجل ، حول مشاكل التعليم والمعلمين بالمنيا ، واهم المشكلات التى يسعى عزب لحلها يوميا من خلال الجولات والزيارات اليومية للمدارس بجميع الادارات التعليمية للوقوف على الواقع التعليمى ومحاولة الوقوف على السلبيات لعلاجها ، وتم عرض مشاكل المعلمين بالمنيا من قبل الاستاذه هناء خيرى وجاء الحوار كالتالى : 

 بداية بنرحب بحضرتك ما رأى حضرتك فى شعب المنيا ومنصبك الجديد كـوكيل وزارة بمحافظة المنيا ؟
 الشعب المنياوى شعب جميل وطيب وانا لاحظت ان الناس هنا عايزة اللى يسمعها ويفهمهم لانهم مفتقدين ده ، وانا سعيد جدا فى المنيا وبسمع الكل واحل المشاكل بدون ضوضاء او شو ، ولذلك انا فى اى زياره لاى مدرسة بسمع اى مشكله سواء من معلم او طالب او ادارة وبنستقبل على الفاكس يوميا مشاكل لمختلف الفئات وبرد على الكل ، وبحاول على اد مااقدر احل اى مشكله سواء للطلبة او الادارة او المعلمين 

من خلال موقع حضرتك مااهم التحديات التى واجتهك فى منصبك الجديد ؟
اكد السيد محمد عزب ان العاملين بجميع الادارات التعليمية والمديرية يقومون بعملهم ولكن يحتاجون الى التوجيه والرقابه فى بعض النقاط ، حيث انه لايعمل الكل فهناك من هو ضميره صاحى وبيشتغل وهناك عدد منهم يحتاج للرقابه والتدقيق فى عمله حيث ان الهدف الاسمى ان يستفيد الطالب وان يصل للحد الاقصى من المعرفه ولايتم ذلك الا بتضافر جميع الجهود للعاملين من اول وكيل الوزارة حتى اصغر عامل ، واضاف عزب انه يسعى يوميا لتلقى مشاكل التعليم لحلها على قدر الامكانات والقوانين واللوائح المتاحة .

هناك فجرة بين المعلمين والقيادات التعليمية بالمديرية سابقا ، ماخطة حضرتك للتواصل مع المعلمين وهل هناك امكانية لعمل لقاء شهرى للمعلمين للتعرف على مشكلاتهم ومحاولة حلها ؟
وجاء رد عزب انا لما بروح اى مدرسة بستمع للكل الطالب والمعلم وسبق واتوجهت لمدرسة والمعلمين فيها طرحوا عليا مشكلات قلتلهم مكتبى مفتوح للكل وانا ارحب بالمعلمين والتحاور معهم لحل مشكلاتهم ولو ليهم حق ياخدوه ، لكن المشكله ان بعضهم مش بيبقا فاهم القوانين والقرارات الصادرة وبناءا عليه لما نقعد ونتكلم اكيد انا هفهم وهما كمان هيفهموا .
اما عن عقد لقاء شهرى مع المعلمين انا على اتم الاستعداد بلقاء شهرى مع المعلمين يتم تنظيمة كل شهر واسمع المعلمين ، وبالفعل سيتم دعوه وفد من كل ادارة تعليمية لجميع القرارات والفئات للمعلمين والاخصائيين لبحث اى مشكله فى اى ادارة ويتم اللقاء شهريا وانا هسمعهم ونحاول نشوف حل للمشكلات بتاعتهم ونسمع بعض كحلقه للتواصل بينى وبينهم فى ضوء الامكانات والنظم واللوائح والقوانين .

اكبر مشكله بتواجه المعلمين بالمنيا هى اختلاف المرتبات بين الادارات بل بين المدارس فى الادارة الواحده ماخطة حضرتك لحل تلك المشكله ؟
بالفعل انا لاحظت كدا وسمعت معلمين كتير اتكلموا عن كدا مش بس فى المنيا دى للاسف مشكله فى معظم المحافظات ، لازم المعلم يبقا راتبه زى قرينه فى نفس التعيين فى اى ادارة او مدرسة تانية ، ولذلك جارى الان تصميم برنامج الكترونى يكون فيه كل القرارات والتعيينات حسب حالة كل معلم لتوحيدها على كل الادارات التعليمية بالمنيا ، وقد اصدرت توجيهات للاستاذ احمد عبد الحكيم رئيس الماهيات بسرعه انجاز البرنامج لحل مشكله تفاوت المرتباتبتوحيد المرتبات بين جميع الادارات 

ثانى مشكله بتواجه معلمين المنيا هى الخصومات من مرتبات المعلمين واخرهم علاوة 2008 من قرارات 53 و 74 و 244 ؟

انا فعلا مطلع على المشكله دى ولكن هناك قرار صادر من التنظيم والادارة وهى الجهه التى توجه وتنظم عمل جميع المديريات التعليمية ، والقرار بيقول ليس من حق المعلمين العلاوة وبالتالى هناك مذكرات للعرض فى مختلف الجهات ولو ليهم حق هياخدوه وقت مايبقا فيه قرار بالاحقيه لكن القرار الحالى الموجود هو عدم احقيتهم فى العلاوة تم تعميم هذا القرار على باقى المحافظات يبقا ازاى انا اديهم علاوة جهه منظمة بتقول مش حقهم ، يوم مايحجيلى قرار بان العلاوة حقهم يتنفذ .
مشكله تانية بتقابل المعلمين ان بعض الادارات التعليمية مسئولى الماهيات بها يتخذون قرارات مخالفه لتعليمات المديرية للخصم من المعلمين مثل ادارتى ابوقرقاص وملوى ؟
وجاء رد عزب - احيانا بيبقا فيه قرار صح بيوصل بدرى لادارة ومتاخر لادارات تانيه وبالتالى بيبقا فيه فرق فى توقيت التطبيق ولكن مفيش موظف من حقه الخصم من معلم الا اذا كان خصم بقرار صح غير كدا لأ ، واضافت الاستاذه هناء خيرى بان هناك مشكله خصم حافز الاعباء الوظيفية من معلمين ملوى رغم وجود تعليمات من المديرية بصرف الحافز ولكن مدير ماهيات ملوى يتعنت فى التنفيذ وافاد السيد وكيل الوزارة بانه ينتظر مذكره للمشكله وسيتم اعطاء تعليمات بصرف الحافز ومحاسبة المتسبب فى وقفه اذا ثبت حق المعلمين فى الاعباء الوظيفية بالفعل .

ماخر ماتم التوصل اليه فى اجازة يوم السبت لمحافظة المنيا وهل سيطبق على جميع المدارس ام مدارس الفترة الواحدة ، وهل سيتم احتساب يوم السبت ضمن 18 يوم توقيع للحصول على حافز الاداء فى حالة اذا كان يوم السبت اجازة ؟

قرار احتساب اجازة يوم السبت مازال فى اروقه المحافظة وفى انتظار القرار قريبا حال اعتماد المحافظ ، وفى حال صدوره سيطبق على جميع المدارس سواء الفترة او الفترتين ، وهو الفرق كله نص ساعه او ساعه الا ربع يبقا مفيش مشكله لمدارس الفترتين لانى انا عندى 450 مدرسة تعمل بنظام الفترتين وبالتالى اذا صدر القرار سيكون لكل المدارس فتره او فترتين ووقتها هيتم الاعلان رسميا .

اما بخصوص اجازة يوم السبت لن يتم احتسابها ضمن 18 يوم توقيع ، المعلم هياخد اجازة يوم السبت كل اسبوع وهيشتغل 5 ايام فقط علشان احسبله السبت كدا هظلم الطالب لو ابنى او ابنك راح المدرسه ومالقاش المعلم علشان هو غايب مين يجيب حقهومين يعلمه ،  وبالتالى هيبقا قدامك يومين فقط حقك اجازة حسب ايام الشهر واذا غيبت اكتر يتخصم حافز الاداء لان ده قانون ، كلنا بنشتغل علشان الطالب ده ، ومع ذلك سيتم دراسة مدى قانونية ان يكون يوم السبت ضمن 18 يوم توقيع ولكنه حتى الان خارجهم .

مشكله تانيه وهى وقف تغيير المسمى الوظيفى للمعلمين وخاصة مدرس فصل ومعلمين اللغة الفرنسيه وماموقف تدريس اللغة الفرنسيه فى المرحله الاعدادية لان فيه محافظات طبقته ؟

يعنى ايه تغيير مسمى وظيفى المعلم المعين على كادر مرحلة ابتدائية ماينفعش يجى يقولى اروح اعدادى لانى انا عندى عجز اساسا فى ابتدائى ، ثانيا انا عندى عجز كبير فى معلمين الفصل على مستوى المديرية وللاسف فيه ناس فاهمه قرار تغيير المسمى الوظيفى غلط ، نفهمه الاول القرار بيقول ان التغيير بيتم اذا كانت الماده اللى هتتركها وتغيرها مافيهاش عجز وبالتالى اغيرلك غير كدا لأ ، حضرتك عند بداية تعيينك كمعلم مضيت على مدرس فصل او مدرس ابتدائى ورضيت بكدا ، ولكن ماينفعش ماده او تخصص فيه عجز وافتحله تغيير ده اصلا ضد القرار الصادر ، طيب لو انا غيرت وكله غير من معلم فصل طالب ابتدائى اجيبله مدرسين منين  ؟! ، اما اللغه الفرنسيه مش هتطبق لان عددهم كبير ومافيش اماكن ليهم ولو طبقت وخدتهم من ابتدائى العجز هيزيد فى ابتدائى ودى اهم مرحلة تعليمية هى الاساس للمراحل التاليه يبقا التسكين عليها له الاولوية عن باقى المراحل . 



صرحت وزارة التربية والتعليم عن مسابقة قريبه لتعيين معلمين جدد فهل فيه مسابقة هتنزل فى المنيا لتعيين معلمين جدد ؟

الوزارة بالفعل خاطبتنى وارسلت العجز فى المنيا والمواد اللى محتاجه معلمين واى مسابقة هتتم طبقا للقانون الجديد من الوزارة وهيتم فى حينها الاعلان عنها ولكن حاليا بيتم مرحلة حصر العجز فى جميع المحافظات والعجز عندى اكتر حاجه علوم ورياضه

مشكله المشرفين الاجتماعيين والخصم لبدلاتهم رغم صدور قرار وزارى بمساواتهم بالاخصائى الاجتماعى ..
 هل هناك حل لمشكلتهم ؟


انا عارف المشكله ومطلع عليها الناس دى صدرلهم قرار من مجلس الدولة بعدم احقيتهم فى البدلات لانهم مؤهل فوق متوسط ، ومش تابعين كدا لقانون 155 لسنة 2007 لان القانون فيه مؤهلات عليا اللى هو الاخصائى الاجتماعى وبالتالى انهم يحصلوا على البدلات بموجب القانون غير صحيح ، وكمان مجلس الدولة افاد فى رده ان القرار الوزارى الصادر ليهم غير صحيح ،  وافاد مدير الماهيات انه سيتم العرض على الوزارة بمذكرة لبحث مشكلتهم ومدى مشروعيه القرار زى ماحصل فى حافز الاداء لاجازة الوضع .

عزب يفتح بابه للمعلمين بلقاء شهرى لحل مشاكلهم وحوار حول اجازة السبت وخصومات المعلمين وتغيير المسمى الوظيفى والمسابقة الجديدة




مشكله العجز الشديد فى معلمين العلوم والرياضيات ماخطة حضرتك لعلاجها وهل فعلا فيه عجز ولا سوء توزيع وهل ممكن نتعاقد مع معلمين بالحصه لسد العجز ؟


المشكله دى موجوده بالفعل انا عندى زياده فى معلمين علوم لادارة المنيا فوق 120 معلم ، وعجز فى ادارات تانية وانا مقدرش اتعاقد ده مش بتاعي ده نظام دوله وخاصه ان التعاقد عايز ميزانيه والناس دى بعد كدا هتطالب بالتعيين وده عبء على الدولة ،وكمان احنا عندنا زيادات في حاجات تاني بس فيه تخصصات مينفعش ليها برنامج تحويلي علشان اقولك احولك من معلم عربي لمعلم رياضه مينفعش، ولذلك سيتم اعاده التوزيع لسد العجز وبالفعل يتم حاليا بجميع الادارات حصر العجز والزياده والنصاب القانونى لمعلمين جميع المواد لان القصه مش عجز ده سوء توزيع وفيه خطه لحل تلك المشكله ، وقد عرضت الاستاذه هناء خيرى امكانيه الاستفاده من خرجى الكليات مثل تربية وعلوم المكلفين بالخدمه العامة كل عام ليؤدوا خدمتهم بالمدارس وخاصة فى التخصصات اللى فيها عجز واكد عزب انه بالفعل هذا الاجراء من ضمن الحلول التى يضعها سيادته للتنفيذ بعد دراستها لامكانية التنفيذ الفتره القادمة ، وان الفتره القادمة ستشهد حل لكل تلك المشاكل .

هناك مشكله للمعلمين العاملين بعقد 50 جنيه وهى تاخر مرتباتهم وعدم تقنين وضعهم المالى والوظيفى حتى الان ؟

عقد ال 50 جنيه قانونا وماليا مش تابعين ليا كتربية وتعليم دول تابعين للمحافظة ، وبيقبضوا كل تلات شهور لانهم صناديق خاصه وهما وافقوا على كدا ووقعوا على هذا الاساس وهما عارفين كدا ووضعهم بيتم بحثه فى الجهات المعنية المالية والتنظيم والادارة لتقنين اوضاعهم الوظيفية .


هناك المعلمين قرار 19 / 20 مؤهلات متوسطه تم الخصم من مرتباتهم 200 جنيه واصبح مرتبهم 700 جنيه وهما حتى مش عارفين الخصم ليه ؟


المشكله دى عند استاذ احمد مدير الماهيات وان شاء الله فى لقاء المعلمين كل المسئولين الاداريين والماليين بالمديرية هيبقوا حاضرين علشان يردوا على كل الاسئلة ونحاول نجد حل لمشاكل المعلمين حسب القوانين واللوائح والنظم .


مشكله منع الحصول على اجازة بدون مرتب للمعلمين او مرافقه زوج للمعلمات بقرار المحافظ ماموقف المديرية وحضرتك منها ؟


اولا المحافظ لم يصدر قرار عشوائى ولكن القرار وفقا للقانون رقم 81 المادة رقم 53 فقره اجازة بدون مرتب لتنظيم العمل ، والقرار للمواد اللى فيها عجز فقط ، حسب مايكتب التوجيه ووفقا للعجز او الزياده ، ماينفعش واحد بيشتغل اديله 20 سنه برا وعايز يجدد حضرتك خلاص قدم استقالتك وسيب فرصه لغيرك هتفضى درجه مكانك ، ولكن بالنسبة للمعلمين الذين يحصلون على اجازة اول او تانى مره حتى خمس سنوات المحافظ بيوافق على الكل واسبوعيا بودى مذكرات والمحافظ بيوافق للناس حتى لو فيه عجز ولكن لو محتاجه واديله 20 سنه فى الخارج وفيه عجز فى مادته ده قانون حيت تنص المادة رقم 53 من قانون 81 لسنة 2016 انه " يجوز للسلطة المختصه منع الموظف من اجازة بدون اجر للاسباب التى تبديها او تقدرها السلطة المختصه ووفقا لحاجة العمل " ، وعلشان كدا بحاول افهم الكل ان ده قانون بيطبق على الكل سواء بقرار محافظ او بغيره  .


وفى نهاية اللقاء ابدى المعلمين شكرهم للسيد وكيل الوزارة الاستاذ محمد محمود عزب ، لسعه صدرة وذكرت هناء خيرى انه لاول مره منذ سنين ياتى مدير مديرية يسمع المعلمين ويتواصل معهم ويحاول حل مشكلاتهم ويكون بابه مفتوح للكل واضاف  مصطفى الكومى انه كانت هناك فجوة كبيرة بين المعلمين ومسئولين المديرية وكان صعب المعلم سابقا يدخل يقابل وكيل الوزارة لكن لاحظنا ان حضرتك بابك بالفعل مفتوح للكل ، وتم اتخاذ قرار انه سيتم خلال الفتره القادمة التنظيم لعقد لقاء شهرى للمعلمين من خلال دعوه وفد من المعلمين لكل ادارة كممثلين ويعرضوا ويتحدثوا عن مشاكل ادارتهم لجميع الفئات لاول سابقة فى المديرية فى عهد الاستاذ عزب وسيحضر اللقاء المسئولين الماليين والاداريين والتسويات بالمديرية لبحث اى مشكله باى ادارة خاصة بالتعليم والمعلمين ، وستتم الدعوة بالتنسيق مع مكتب وكيل الوزارة والمنسقين الاستاذه هناء خيرى والاستاذ مصطفى الكومى وسوف يتحدث المعلمين لاول مره بلسانهم لنقل مشاكلهم لادارة المديرية دون وجود اى عائق .





سجل سيرتك الذاتيه واحصل على وظيفه مناسبه مع بيت كوم
اعلانك هنا
  • التعليقات على الموقع >>>>>
  • تعليقات الفيس بوك
Item Reviewed: عـــزب يفتح بابه للمعلمين بلقاء شهرى لحل مشاكلهم وحوار حول اجازة السبت وخصومات المعلمين وتغيير المسمى الوظيفى والمسابقة الجديدة Rating: 5 Reviewed By: هناء خيرى