مشروع البحث للطلاب من 3 ابتدائى الى 3 اعدادى بكل بساطة هيكون مكون من 6 اجزاء واليكم الشرح ومثال للتوضيح وشكل البحث


 الدكتور طارق شوقى وزير التربية والتعليم والتعليم الفنى يوضح مشروع البحث للطلاب من الصف الثالث الابتدائى حتى الصف الثالث الاعدادى
وكيفية اعدادى المشروع البحثى اللى هيكون شرط اساسى للنجاح والانتقال للصف الاعلى 
موضوع المشروع
تغطية كل العناصر المطلوب كتابتها فى البحث
كل سنة دراسية يكون ليها مشروع واحد متعدد التخصصات يغطى كل المواد الدراسية 
يوم 9 ابريل هيتم الاعلان عن مجموعة مشاريع مختلفة لكل سنة دراسية علشان تختار واحد منهم وتشتغل عليه لوحدك او مجموعة من 5 طلاب حد اقصى 
اثناء الشغل على المشروع هيكون متاح ليك مصادر مختلفة للبحث 
المكتية الالكترونية - كتب المدرسة - القنوات التعليمية - موقع وزارة التربية والتعليم - موقع نهضة مصر - موقع مكتبة لبنان ناشرون - موقع النصوص الالكترونية والتعلم الرقمى - مصادر اخرى
الهدف الاساسى " البحث والتفكير والتعلم الذاتى مش الحفظ ولا الاجابات النموذجية "
المشروع هيكون بيتكلم عن موضوع معين يختلف على حسب السنة الدراسية ومطلوب منك كطالب البحث عن كل ما يتعلق بالموضوع ده فى كل المواد علشان تغطى كل العناصر المطلوب كتابتها فى البحث 
مثال :- لوانت طالب فى اولى اعدادى والمشروع عن " المناخ " 
هتلاقى اسئلة او عناصر مختلفة منهم
السؤال الاول :-  اثر التطور العلمى والتكنولوجى على المناخ 
فاول حاجة انت محتاج تعملها هى البحث عن الموضوعات المتعلقة بالمناخ فمثلا
لو دخلت على المكتبة الالكترونية ابحث عن كلمة " المناخ " فى محرك البحث 
وتقدر تصفى النتائج اللى ظهرت بالسنة الدراسية عن طريق الكلمات الدالة من القائمة اللى هتظهرلك على الشاشة جنب المحتوى 
وعلشان تلاقى كل الموضوعات المتعلقة بالمناخ فى جميع المواد
وممكن تزود الاشارات او تعدل فيها وهتلاقى دروس تفاعلية ومصادر مختلفة تساعدك تفهم الموضوع اكتر 
سؤال تانى : - تخيل انك فى رحلة للفضاء .. ماذا تتوقع عن نسب الغازات الموجودة فى الغلاف الجوى واثر زيادة غاز ثانى اكسيد الكربون على الانسان ؟
ممكن تبحث عن الكلمات الرئيسية فى الموضوع زى الغلاف الجوى وتختار النتائج المتعلقة بالصف الاول الاعدادى 
هتلاقى فى نتائج البحث  موضوع اسمه كوكب الارض واهمية الغلاف الجوى جواه محتوى تفاعلى بيشرح خصائص الغلاف الجوى والغازات اللى بيتكون منها وغيرها من المعلومات اللى هتفيدك فى كتابة الموضوع 
اثناء عملية البحث متنساش تكتب النقاط والمعلومات المهمة اللى بتلاقيها علشان ممكن تستخدمها اثناء كتابتك للمشروع 
المشروع اللى هتسلمة لازم يكون مكتوب باطار معين " اطار المشروع "
1- عنوان الموضوع او البحث " جملة البحث "
2- الرقم التعريفى الخاص بيك وبزملائك فى حالة كنتوا مجموعة 
3- مقدمة عن الموضوع 
4- عناصر الموضوع المختلفة اللى هتتكون من خلال عملية البحث
5- النتائج اللى وصلت اليها فى البحث وملاحظاتك عليها " استبيان تمام البحث "
6- اوعى تنسى فى الاخر .. تكتب كل المصادر اللى استخدمتها فى البحث " المراجع "
اخر حاجة :- يوم 9 ابريل هتحدد موضوع البحث اللى هتشتغل عليها لكل سنة دراسية بمعنى لسة مش هنبدا نعمل ابحاث الا لما الوزارة تحدد موضوعات البحث يوم 9 / 4 / 2020
اتمنى التوفيق للجميع وسنقدم لكم كل ما هو جديد بطريقة بسيطة .... محمد زكى الشيمى